تنظيم وإدارة الوقت

تخيل في الأيام الصعبة إلي عايشينها دلوقت واحد معاه مية ألف دولار و بيرميهم علي الأرض، أكيد هتقول عليه مجنون رسمي، طيب ماهو الحد دا مش بعيد عننا أنت معاك رأس مال كبير ومع ذلك بتضيعه كله أو معظمه في اللاشئ ورأس المال دا هو وقتك.

?ليه ممكن تضيع وقتك؟

▪️أكبر سبب يخليك تضيع وقتك عدم إدراكك لقيمته، مش مدرك إن دا رأس مال أصلا، وعمرك ما هتسعي لاغتنام شئ وأنت مش عارف قيمته.

▪️أسباب تانية زي التسويف تأجيلك الغير مبرر للعمل وعندك دايما طول أمل ومعتقدإن لسه بدري وعادي هيبقي في فرص تانية.

▪️مشتت نفسك بأهداف واهتمامات كتير وبالتالي مش بتبدأ فى أي حاجة.

▪️السوشيال ميديا بتسرق معظم وقتك. 

▪️منتظر دايمًا  وجود حافز ورغبة علشان تبدأ.

?إزاي أدير وقتي؟

1. راقب وقتك.

شوف أنت علي مدار اليوم عملت إي في24 ساعة.

2. لا تترك الوقت للمصادفة، ودا عن طريق إنك تحط  خطة يومية تساعدك فى تحقيق أهدافك وتحدد وقت بداية ونهاية كل  مهمة.

3.قلل وقتك علي السوشيال ميديا لأنها سلاح ذو حدين هتلاقى نفسك اندمجت مع حاجات مش مهمة ومش هتفيدك بل هتضعف تركيزك وتأثر علي وقت المهام التانية وتضعف إنتاجيتك فحدد أنت عاوز إي بالظبط قبل ما تفتح أي أبليكيشن. 

4.استغل أوقات الانتظار والأوقات البينية في القراءة أو سماع بودكاست.

5. متعملش حاجتين فى نفس الوقت، لأنك هتشتت نفسك وبالتالي مش هتخلصهم بالإتقان المطلوب.

6. فوض المهام الأقل أهمية، علشان تركز وقتك وجهدك على المهام الأكثر .

7. ابعد عن التسويف والمماطلة. 

8. خلي معاك نوتة دايما وأنت بتعمل أي مهمة تكتب فيها كل الأفكار إلي بتجيلك وتشتتك وبالتالي تضيع وقتك.

9. خليك مرن في التعامل مع الوقت، بمعنى إن لو جالك مهمة طارئة خلصها وبعدين كمل خطتك اليومية تاني.

10. وأهم حاجة تدرك قيمة وقتك وإن كل ثانية بتعدى جزء من عمرك المحدود.